Chronika brigady 1997-2005

Chronice na puć

Předsydstwo 1. serbskeje kulturneje brigady w róžowniku 2024

75 lět skutkowanje 1. serbskeje kulturneje brigady zjimane jako digitalny knižny poskitk –
to bě zaměr šulerkow a šulerjow 9. lětnika pod nawodom rjadowniskeje wučerki Juliany Rječkec. Nastali su wosom jednotliwe knihi, dźělene do časowych wotrězkow. W předpolu bě trěbne časowe dokumenty w formje fotow, tekstow a widejow rjadować a digitalizować. Wulka pomoc bě při tym studio Lucija pod nawodom Michała Cyža. Skónčnje bě tak daloko. Šulerjam steješe chronika z ryzy faktami skutkowanja a wulka syła časowych dokumentow k dispoziciji. Za šulerjow steješe nětko naročny nadawk, z wulkeje ličby datow najwažniše a najzajimawše podawki wupytać, do knihow splesć a je wuhotować. Bě to za 15lětnych jězba do zańdźenosće. Husto so za wosobinami abo skrótšenkami organizacijow
a městnosćow prašachu. Amizěrowachu so nad čorno – běłymi wobrazami zažnych lět, kaž nad fotami z nowšeho časa, na kotrychž toho abo tamneho přećela abo swójbneho spóznachu.
Kóžda jednotliwa kniha ma druhi rukopis, kotryž wuhotowar Štefan Hanuš jako zakład za dalše wobdźěłanje wužiwaše. Narok njebě tón, perfektnu knihu wuhotować, ale šulerjo dóstachu składnosć so we wuhotowanju pospytać. Wšitcy nałožowachu wjele prócy
a pokazachu angažement.
Tójšto šulerjow rjadownje spěwa tohorunja w chórje 1. serbskej kulturneje brigady sobu.
Tak su nastali knihi nětčišich brigadnikow za bywše a přichodne generacije brigadnikow, za jich sympatizantow a scyła lubowarjow serbskeho spěwa. Wjeselimy so, zo wobsteji móžnosć sej dopomnjenki wobhladać a w knihach listować. Njewobsteji prawo na dospołnosć.
Jeli-zo tón abo tamny čitar ze wšěm spokojom njeje a druhe informacije ma, tak wjeselimy so nad kóždym pokiwom!

Wjele wjesela při listowanju!

Šulerjo a šulerki, kotřiž su na tutych knihach dźěłali:

Baumgärtlec, Paula
Bauch, Moritz
Budar, Kito Beno
Cyžec, Madlena Philomena
Čornak, Matej
Ćemjer, Beno
Dubawic, Helena
Handrikec Marta Daria

Hančikec, Luisa Marta
Hoza, Metod
Hicka, Danko
Jurk, Milan
Kliman, Franc
Krahl, Dionys-Aron
Malink, Friedrich
Pilzec, Stella Maria

Rauerec, Anastasija
Richter, Franc
Statnik, Ionel
Statnik, Matej Feliks
Suchec, Lydija
Šnabl, Jan
Wićaz, Cajus
Žur, Filip

Projekt spěchuje so wot Załožby za serbski lud, kotraž dóstanje lětnje přiražki z dawkowych srědkow na zakładźe hospodarskich planow, wobzamknjenych wot Zwjazkoweho sejma, Krajneho sejma Braniborskeje a Sakskeho krajneho sejma.

1997

februar

W Rozhledźe 97/ 2 pisa C. Meškankowa pod nadpismom „Chór Serbskeho gymnazija ma noweho nawodu":

„Na koncert njepřińdźechu jenož serbscy a němscy wěriwi z Budyšina, ale tež napadnje wjele zajimcow z našich serbskich wsow. Přibližnje 70 spěwarkow a spěwarjow zanjese naročny program ze serbskeje a mjezynarodneje chóroweje literatury. Chórowu premjeru měješe mjez druhim „Ecce sacerdos magnus” wot Antona Brucknera. Napadnje lochce wza dirigent hodowne spěwy z oratorija „Zyma" wot K. A. Kocora. Při tym stwori so
z čerstwymi młodymi hłosami wosebita atmosfera. ...Skulojčeny bu tutón koncert wot dujerjow
z orchestra SLA. Z korbikami při durjach nazběrachu wuhotowarjo koncerta 1 111,00 hr za Serbsku cyrkej... A je za nich wobohaćenje, měć składnosć, pod profesionalnym nawodnistwom so intensiwnje zaběrać ze serbskej chórowej literaturu a runočasnje tež dóstać dohlad do składbow, kotrež słušeja sobu k standartnemu wobstatkej w mjezynarodnym měridle..."

11.06. - 14.06.1997

Chórowe lěwo so w Sosnowkach blisko Jeleneje Góry w Pólskej wotměje. Zwučuje so hłownje B. Krawcowa „Łužisko-serbska bjesada", přihotujo z tym swjedźenski program składnostnje 50. narodnin Serbskeho gymnazija.

Wo chórowym lěhwje w Sosnowkach
w Pólskej 11.6. - 14.6.97 pisatej K. Jaworkec
a H. Wjacławkec w chronice:

„...Jězba wotběža hač k hranicy bjez problema. Ale při kontroli wupokazow so zwěsći, zo bě šulerka 9. lětnika město dźěćaceho wupokaza šulerski sobu wzała, a tón wězo tu njepłaćeše. ... Po połhodźinskim čakanju móžachmy přez hranicu. Hižo zdaloka wuhladachmy naše chatki w krasnej wokolinje. Wšitko běše zelene, a na łukach dźěłaše so syno. ... Po wobjedźe dźěše do zwučowanjow hač do pózdnjeho wječora z wjetšej přestawku. Hakle po tutym napinanju mějachmy swobodne hač do ranja. ... Ale po snědani dźěše ze zwučowanjemi dale....
Pjatk po wobjedźe dojědźechmy sej z liftom na Sněžku. Mějachmy krasny wuhlad na Pólske hory. Na wjeršku zaspěwachmy sej a pućowarjam, ale hižo bližachu so mróčele dešća, kiž nas po puću dele chětro namačachu. ... Jako wusłyšachmy we hłownym domje lěhwa hudźbu, bě wša mučnota z našich kosći. Na probje sobotu rano pak pytnjechmy, zo nam spar faluje. Na kóncu pak klinčachu spěwy Bjarnata Krawca woprawdźe rjenje."

25.09.1997

Swjatočnosć k 50. róčnicy gymnazija z wobšěrnym pisanym programom wšitkich spartow kulturneje brigady. Přitomni běchu zastupjerjo kultusoweho ministerstwa, wyšešulskeho a šulskeho hamta, Domowiny, serbskich šulow, serbskich institucijow, Załožby za serbski lud, bywši a nětřiši wučerjo a kubłarjo, krajny rada Horst Gallert, kotryž bufet zapłaći, a šulerjo. Předstaji so film Tonija Bruka a Marka Grojlicha „Tři mjena - jedna šula".

10.10.1997

Předstajenje „Fecera" na Walldorfskej šuli w Bochumje bě wulki wuspěch. Jimace słowa dźaka słyšachmy ze wšěch stron. Šulerjo so jara přijomnje w staršiskich domach přijachu.

Serbske nowiny pisaja dnja 14.10.1997:

„... Prěnjotne wobmyslenja ze serbskeje strony sem, zo njebychu tam serbsku hru rozumili, wotkiwny Reinhard Marsollek (wučer na tamnišej Walldorfskej šuli, kotraž ma dobre kontakty k Serbskemu gymnazijej) jako zbytne. Wšako su wuměłske elementy tak skutkowne, zo njeje ani cyłkowneho přełožka hry trjeba. ... Po tym zo buchu serbscy gymnaziasća jara lubje wot tamnišich šulerjow a jich staršich witani
a zastarani, njejsu so do předstajenja pjatk wječor cyle bjez napjatosće podali. Tola tež tamniši publikum - na pjeć stow ludźi - běše z „Fecera" přewšo hnuty a runje tak zahorjeny, tak zo je cyła žurla z přikleskom ržała. Su wobdźiwali, kak móža młodostni z tajkej temu - rozestajenje młodostneho ze smjertnej chorosću - wobchadźeć ... "

1998

14.05. - 20.05.1998

Wulki chór wobdźěli so na mjezynarodnym chórowym wubědźowanju w Balašichje pola Moskwy.

Serbske nowiny pisaja dnja 20.05.1998:
„... Cyłkownje 29 chórow na tuchwilnje hišće trajacym wubědźowanju w Moskwje wustupi, nimo Budyšanow a chóra z Běłoruskeje a z Bołharskeje přińdźechu wšě chóry z Ruskeje sameje. Wobłukowy program wobsahowaše mjez druhim natočenje w Moskowskej telewiziji a wjedźenje přez Moskwu... Wopismo za jara dobre wobdźělenje swědči wo wuspěchu brigadnikow."

https://static.wikia.nocookie.net/metro2033/images/0/04/BalashikhaMap.webp/revision/latest?cb=20230926165853&path-prefix=de
(wotwołane: 19.02.2024)