Chronika brigady 1969-1978

Chronice na puć

Předsydstwo 1. serbskeje kulturneje brigady w róžowniku 2024

75 lět skutkowanje 1. serbskeje kulturneje brigady zjimane jako digitalny knižny poskitk –
to bě zaměr šulerkow a šulerjow 9. lětnika pod nawodom rjadowniskeje wučerki Juliany Rječkec. Nastali su wosom jednotliwe knihi, dźělene do časowych wotrězkow. W předpolu bě trěbne časowe dokumenty w formje fotow, tekstow a widejow rjadować a digitalizować. Wulka pomoc bě při tym studio Lucija pod nawodom Michała Cyža. Skónčnje bě tak daloko. Šulerjam steješe chronika z ryzy faktami skutkowanja a wulka syła časowych dokumentow k dispoziciji. Za šulerjow steješe nětko naročny nadawk, z wulkeje ličby datow najwažniše a najzajimawše podawki wupytać, do knihow splesć a je wuhotować. Bě to za 15lětnych jězba do zańdźenosće. Husto so za wosobinami abo skrótšenkami organizacijow
a městnosćow prašachu. Amizěrowachu so nad čorno – běłymi wobrazami zažnych lět, kaž nad fotami z nowšeho časa, na kotrychž toho abo tamneho přećela abo swójbneho spóznachu.
Kóžda jednotliwa kniha ma druhi rukopis, kotryž wuhotowar Štefan Hanuš jako zakład za dalše wobdźěłanje wužiwaše. Narok njebě tón, perfektnu knihu wuhotować, ale šulerjo dóstachu składnosć so we wuhotowanju pospytać. Wšitcy nałožowachu wjele prócy
a pokazachu angažement.
Tójšto šulerjow rjadownje spěwa tohorunja w chórje 1. serbskej kulturneje brigady sobu.
Tak su nastali knihi nětčišich brigadnikow za bywše a přichodne generacije brigadnikow, za jich sympatizantow a scyła lubowarjow serbskeho spěwa. Wjeselimy so, zo wobsteji móžnosć sej dopomnjenki wobhladać a w knihach listować. Njewobsteji prawo na dospołnosć.
Jeli-zo tón abo tamny čitar ze wšěm spokojom njeje a druhe informacije ma, tak wjeselimy so nad kóždym pokiwom!

Wjele wjesela při listowanju!

Šulerjo a šulerki, kotřiž su na tutych knihach dźěłali:

Baumgärtlec, Paula
Bauch, Moritz
Budar, Kito Beno
Cyžec, Madlena Philomena
Čornak, Matej
Ćemjer, Beno
Dubawic, Helena
Handrikec Marta Daria

Hančikec, Luisa Marta
Hoza, Metod
Hicka, Danko
Jurk, Milan
Kliman, Franc
Krahl, Dionys-Aron
Malink, Friedrich
Pilzec, Stella Maria

Rauerec, Anastasija
Richter, Franc
Statnik, Ionel
Statnik, Matej Feliks
Suchec, Lydija
Šnabl, Jan
Wićaz, Cajus
Žur, Filip

Projekt spěchuje so wot Załožby za serbski lud, kotraž dóstanje lětnje přiražki z dawkowych srědkow na zakładźe hospodarskich planow, wobzamknjenych wot Zwjazkoweho sejma, Krajneho sejma Braniborskeje a Sakskeho krajneho sejma.

Sobustawy

z lěta 1969

15.02.1969

Nowy nazwučowany program za zajězd do Ludoweje Pólskeje předstaji kulturna brigada před wojakami kmótřiskeje jednotki w Budyšinje. Program wospjetuje so w Chrósćicach a Njebjelčicach.

25.04. - 04.05.1969

Kulturna brigada přebywa na tydźenskim zjězdźe w Ludowej Pólskej we wójwodstwje Łódź. Zjězd wobsteji z koncertow, wopytow wopomnišćow a městow kaž Waršawa, Łódź a Želazowa Wola.

„...Hordźi, zo so naša kulturna brigada za tutón zajězd wuzwoli, čakachmy na to, što nas wočakuje ... Po wutrobnym přijeću na dwórnišću we Łódźi, hdźež bě naš přećel pan Przezmycki, podachmy so do našeho přebytka. ... Naš program wobsteješe z něhdźe 25 spěwow a třoch rejow. Ze wšěch spěwow lubjachu so publikumej wosebje pólske spěwy:
„Matuleńko, ja nie wyjde", „Płyneły rybeczki", „Chłopoki, chłopoki", kiž sami tež rady spěwachmy. Tež serbske spěwy kaž „Ženje tak rjenje njej było", „Hołbik měra", „Chwalena budź fijałłka", „Budź božmje, moja lubčička", „Štóž so mysle ženić ma", „Hólcy młodźi, zo bychu was chorty wzali", „Ja mam tam lubku za horami", „My so mamy rady" a wězo tež naše reje „Krakowiak", „Słyšće, kak pišćele w korčmje du" a „Reja radosće".
Tute spěwy spěwachmy na našich wjesołych jězbach do wšelakich městow, tež na jězbje do Waršawy. Tam mějachmy přećelske zetkanje z pólskimi dźěćimi. Jim přepodachmy naše dary, małe Krabaty. ... Po wustupach dachmy sej dobru pólsku wječer słodźeć. A přeco zaklinča „Sława", „Sto lat" a spěwy kaž „Hdyž, bratřa, bliša hodźinka, mje wot was dźělić budźe...", a tuta přećelska atmosfera wosta mjez nami..."

23.01.1970

Nowa spěwna skupina ze šěsć holcow a dweju hólcow wutwori so pod nawodom Rity Meltcyneje. Prěni wustup maja na ptačim kwasu w hotelu „Město Budyšin".

Dalše wustupy sćěhuja na olympiadźe serbskeje rěče we Wojerecach, na wokrjesnej burskej konferency w Serbskim domje, na wotewrjenju wustajeńcy bołharskeje kultury w Serbskim domje, na Domowinskej zhromadźiznje w Hrubjelčicach, na konferency funkcionarow Swobodneje němskeje młodźiny w Budyšinje a na swjatočnosćach w šuli.