საშობაო ზღაპარი ,,აყალმაყალი საახალწლო სუფრაზე"

ზღაპარი შექმნილია ახალი წლისადმი მიძღვნილი კონკურსის-ელექტრონული წიგნის შექმნა თემაზე ,,საშობაო ზღაპარი" ფარგლებში

იყო და არა იყო რა, ღვთის უკეთესი რა იქნებოდა, იყო ერთი სუსხიანი ზამთრის საღამო. ოთახში ბუხარი გიზგიზებდა. ბუხრის გვერდით კოხტად მორთულ ნაძვის ხეზე ბრდღვიალა სათამაშოებს ცეცხლის ალი დასთამაშებდა და ოჯახში საახალწლო განწყობას ქმნიდა.

დიასახლისი თავის ორ გოგონასთან ერთად საახალწლო სუფრას შლიდა, მამა კი ლამაზად შეფუთულ საჩუქრებს ნაძვის ხის ქვეშ ალაგებდა და თან სასიამოვნოდ ღიღინებდა.

საახალწლო სუფრას თანდათან ემატებოდა მადის აღმძვრელი და გემრიელი კერძები. ოჯახში სრული ჰარმონია სუფევდა, მაგრამ იგივეს ვერ ვიტყოდით სადღესასწაულო სუფრაზე, სადაც სუფრის გემრიელობებს შორის ჩოჩქოლი ატეხილიყო.
...და არ გაინტერესებთ ჩოჩქოლი რაზე?!
რაზე და ..... სადღესასწაულო სუფრის თითოეული კერძი ლიდერობას იჩემებდა...

სუფრაზე პირველ რიგში მოთავსებულმა მხართეძოზე წამოწოლილმა და პირში ბოლოკგაჩრილმა შემწვარმა გოჭმა ამაყად გადახედა დანარჩენებს და გამოაცხადა:

-ვერ ხედავთ? აქ მთავარი მე ვარ, სუფრის მთელი ადგილი მე მიჭირავს, თანაც ისე გემრიელად და ლამაზად მაქვს კანი დაბრაწული, ადამიანის ხელი პირველ რიგში მე წამეტანება, თქვენ ჩემი ფეხის ფრჩხილადაც არ ღირხართ!

-ერთი ამას დამიხედეთ-გაბრაზებით გამოეპასუხა გაპრიალებულ ქოთანში თეთრ-ყვითლად მოელვარე ინდაურის საცივი-აქ მე ვარ, რაც ვარ, შობა-ახალი წელი ჩემს გარეშე წარმოუდგენელია, თანაც ისე მომამზადა დიასახლისმა, ვინც მიგემებს, ჩემს გემოს ვერასოდეს დაივიწყებს!

-რა ტყუილად იღლებით-თავმომწონედ გაიღიმა გაპრანჭულმა ნამცხვარმა-დაგავიწყდათ, რომ ამ სახლში ბავშვები ცხოვრობენ? მე მათთვის უპირველესი გემრიელობა ვარ, არ დამიწყოთ ახლა ასეო და ისეო, ასეა ეს!