Yn ven litcheragh

Yn Ven
Litcheragh

Keayrt dy row va ben ayn, as v’ee litcheragh scammyltagh. Va dooinney eck goll mygeayrt ayns fritlagyn er y fa nagh row e ven arryltagh dy chooney rish dy charraghey ny eaddeeyn echey.

V’eh corree. Laa dy row hug eh ollan rish y ven as dooyrt eh, "Shoh ollan ry sneeu, as mannagh vel eh jeant mee veih’n laa shoh, ceauym uss magh er cheu yn raad. Ta mee faagit bunnys rooisht as sleih garaghtee orrym!"

"Kiart dy liooar," dreggyr yn ven agh v’ee ro litcheragh dy sneeu, as ansherbee cre’n fa nagh vel yn dooinney jannoo yn obbyr shen eh-hene, smooinnee ee. Agh ren ee lhiggey er dy row ee gobbraghey dy jeean tra erbee va’n dooinney sy thie. Ren ee cur magh yn wheeyl sneeuee er y laare dagh oie roish my daink yn dooinney stiagh voish yn obbyr echey, dy beagh eh smooinaghtyn dy row ee er ve sneeu.

"Vel eh jeant foast as aarloo son yn fidder?" yinnagh yn dooinney gra.

"Bunnys jeant my veen," yinnagh ee gra rish yn dooinney eck. Agh tra va’n chiaghtin bunnys jeant, cha row agh un vluckan sneeuit eck as v’eh crontit as cho garroo as aittin. Eisht haink yn dooinney dy valley.

"Craad t’ou ven? Vel yn ollan jeant foast as aarloo son yn fidder?" vrie eh.

Dy tappee, ren y ven roie seose yn aarey gys y lout eisht cheau ee neose yn bluckan huggey trooid yn towl. "Shegin dooin coontey ny bluckanyn.” dyllee ee. “Freill coontey oo hene, as ceau ny bluckanyn er ash hym reesht, nane er nane."

Hie yn bluckan cheddin sheese as seose, seose as sheese, agh cha row fys echey er yn cluick jeant er. Ren eh coontey yn bluckan cheddin daeed cheayrt.

"Shen eh!" dyllee yn dooinney. "Nish bee ram dy chur da’n ‘idder, as eisht bee eaddagh noa aym, fy-yerrey hoal."

Agh nish va’n ven ayns cront agglagh ee-hene. Cre ry-yannoo?

S’aighoil dy liooar, va cooinaght eck er yn ’oawr va cummal ayns boayl fadaneagh er y clieau, er yn oyr dy row ee er chlashtyn dy row eh ny obbree mie, as dooyrt y ven r’ee hene, "Ta mee treeal goll roym huggey.”

Hie ee er y raad dy moghey laa ny vairagh, ish as ny rowlaghyn olley eck, as hooill ee seose crink, sheese glionteenyn, derrey haink ee fy yerrey dys thie yn ’oawr.

“C’red ta shiu laccal ayns shoh?” dooyrt y foawr.

“Ta mee laccal shiu dy chooney lhiam,” dooyrt ee as dinsh ee da mychione y vluckan snaa as dy chooilley nhee elley.

“Sneeuym yn ollan dhyt,” dooyrt y foawr, “my nee oo ginsh dou yn ennym t’orrym tra hig oo son ny bluckanyn shiaghtin voish yn laa shoh. Vel oo ayns coardailys?”

" Cre’n fa nagh lhisin ve ayns coardailys?” dooyrt y ven er yn oyr dy row ee smooinaghtyn r’ee hene dy beagh eh quaagh dy jarroo mannagh voddagh ee feddyn magh yn ennym v’er roish shiaghtin.

Ansherbee, phrow yn ven dagh aght dy ’eddyn magh yn ennym v’er yn ’oawr, agh, boayl erbee hie ee, cha row peiagh erbee er chlashtyn jeh. Va’n traa goll shaghey dy bieau, as cha row eh cheet lhee feddyn magh ennym yn ’oawr.

Fy yerrey haink yn laa roish yn laa jerrinagh. Agh, myr haghyr eh, va’n dooinney eck cheet dy valley voish y clieau yn laa shen syn astyr beg, as tra haink eh faggys da thie yn ’oawr, honnick eh soilshey gial ayn as cheayll eh cronnane mooar as feddanagh cheet magh ass chammah’s arraneys, as gearaghtee, as yllagh. Myr shen haink eh er gerrey da’n uinnag, as eisht honnick eh yn foawr mooar cheu sthie ny hoie roish y wheeyl, sneeu gollrish yn gheay, as e laueyn getlagh lesh y snaie noon as noal, noon as noal, gollrish y tendreil, as v’eh gyllagh er y wheeyl feddanagh:

Sneeu, wheeyl, sneeu , sneeu wheeyl ny s’tappee,
gow arrane, wheeyl, gow arrane ny syrjey!”
As v’eh goaill arrane, choud’s va’n wheeyl cassey ny s’tappee as ny s’tappee

Sneeu, wheeyl, sneeu;
’rane, wheeyl, ’rane;
Dy chooilley chlea er y thie,
sneeu er my skyn.
Lheeish yn ollan, lhiams y snaie,
S’beg fys t’ec yn ven litcheragh
Dy re Mollyndroat my ennym!

Tra haink yn dooinney dy valley yn fastyr shen v’eh anmagh, as dooyrt e ven rish, "C’raad t’ou er ve cho anmagh? Geayll oo red erbee noa?”

Eisht dooyrt eh, "Foddee oo sneeu lane vie oo hene, ven thie; agh ta mee smooinaghtyn dy vel fer ayn ta ny share na uss, son shen as ooilley. Cha vaik mee rieau lheid y sneeu ayns ooilley’n seihll aym, snaie cho meein as feegan doo-oallee, as cha geayll mee rieau lheid yn arraneys as shen va goll er ayns thie yn ’oawr noght.”

"Cre’n arrane v’eh goaill?” dooyrt yn ven.

As hug eh yn arrane jee:

Sneeu, wheeyl, sneeu;
’rane, wheeyl, ’rane;
Dy chooilley chlea er y thie, sneeu er my skyn.
Lheeish yn ollan, lhiams y snaie,
S’beg fys t’ec yn ven litcheragh
Dy re Mollyndroat my ennym!”

As myr shen, va boggey mooar er y ven tra cheayll ee yn arrane!
“Aw, s’bing yn kiaull shen! Gow arrane reesht, my ghooinney vie,” dooyrt ee. As hug eh jee eh reesht.

Dy moghey laa ny vairagh hie ee cho tappee as dod ee dys thie yn ’oawr. Va’n raad liauyr, as beggan fadaneagh fo ny biljyn, Tra raink ee yn thie, hooar ee yn dorrys foshlit er e beealloo, as hie ee stiagh.

"Ta mee er jeet son y snaie,” dooyrt ee.

"Cum ort, cum ort, ven vie,” dooyrt y foawr. “Mannagh n’insh oo dou my ennym cha vow oo yn snaie – shen va’n conaant ain.”

As dooyrt eh: “Myrshen, cre’n ennym t’orrym?”

“Nee Christian eh?” vrie ee – lhiggey er nagh row fys eck er.

“Cha nee, cha nee,” dreggyr eh.

"Vel ad gra Clague rhyt?” vrie ee.

"Cha nel ad er chor erbee!" dreggyr eh.

"Nee Kissack eh?" vrie ee.

"Cha nee,” dreggyr eh.

"Vel ad gra Cain rhyt?"

"Cha nel ad er chor erbee!" dreggyr eh. "Nish, dty eab s'jerree my sailt, ven!"