Lundur 2023

Á milli 8:50 til 9:10 alla morgna fáum við hafragraut, lýsi og ferska ávexti.

Í Lífsmennt gefst okkur færi á að deila með hvort öðru skemmtilegum sögum auk þess sem við ræðum og reynum að skilja þau lífsgildi sem eru í brennidepli hverju sinni. Einnig eru hugtök eins og mannréttindi og forréttindi rædd út frá Barnasáttmála Sameinuðu þjóðanna.

"Börnin skulu taka þátt í heimspekilegri umræðu. Þau skulu ræða um sig sjálf, heimili, símanúmer, afmælisdaga, nöfn foreldra og systkina, afa og ömmu og mismunandi fjölskyldugerðir." Úr námskrá fyrir 5 ára börn í leikskólum Kópavogs.

Í hádeginu læra börnin að borða með hnífapörum, kennarinn skammtar á diskana og ef geta og aðstæður leyfa skammta börnin sér sjálf. Kennarar eða börn í hjálparstarfi segja gjörið þið svo vel. Börnin eru hvött til að smakka allan mat og sýna með því hugrekki. Allir fá tækifæri til að tjá sig og einn talar í einu.

Eftir hádegismatinn förum við í jógaleiki og slökum á yfir lestri góðrar framhaldssögu og hlustum svo á róandi tónlist.

"Börnin skulu upplifa rólegt og notalegt andrúmsloft. Þau skulu nota góða borðsiði, sýna tillitssemi, hjálpsemi, samhjálp." Úr námskrá fyrir 5 ára börn í leikskólum Kópavogs.

"Börnin skulu upplifa vellíðan með vinum sínum og taka þátt í slökun/nuddi. Þau skulu hlusta á framhaldssögur." Úr námskrá fyrir 5 ára börn í leikskólum Kópavogs.

Á fagnaðarfundum safnast allir í leikskólanum saman á Lundi þar sem nýtt lífsgildi er m.a. kynnt fyrir hópnum. Lundarbörnin stjórna fundinum og fá þannig æfingu í því að koma fram, syngja og tala fyrir framan stóran hóp. Öllum er velkomið að koma fram.

Einu sinni í viku er dregið um hvaða barn fær að fara heim með bangsann Snúlla þar sem hann dvelur hjá barni yfir helgi. Snúlla fylgja spurningar sem tengjast vináttuverkefninu frá Barnaheill sem börnin velta fyrir sér með foreldrum sínum. Svo deila þau svörunum með börnunum næsta mánudag og hvaða skemmtilegu hluti þau gerðu með Snúlla um helgina.

"Börnin skulu hafa jafnan rétt til þátttöku og að hafa áhrif og stjórna." Úr námskrá fyrir 5 ára börn í leikskólum Kópavogs

Markmiðið með Snúlla er að tengja heimilin við verkefnið um vináttuna.

Í vísindum læra börnin um hringrás vatnsins, af hverju eldfjöll eru á Íslandi og hvernig þau virka. Auk þess er hringrás náttúrunnar skoðuð og gerðar eru tilraunir með vatn. Eftir áramót tekur skákin við þar sem byrjað er á peðaskák áður en farið er í mannganginn.

Í málrækt læra börnin að leika með tungumálið á skapandi hátt. Unnið er að því að þroska hljóð- og málvitund þeirra. Við klöppum til að mynda atkvæðafjölda orða, lærum að ríma og að para tölur

"Börnin skulu kynnast fjölbreytni náttúrunnar. Þau skulu kynnast lífríkinu í nánasta umhverfi og tengja það árstíðum." Úr námskrá fyrir 5 ára börn í leikskólum Kópavogs

"Börnin skulu auka orðaforða sinn og leika sér með tungumálið. Þau skulu öðlast skilning á að ritað mál og tákn hefur merkingu." Úr námskrá fyrir 5 ára börn í leikskólum Kópavogs

Deilum gildum okkar til að skapa betri heim

Í frjálsum leik úti gefst börnunum tækifæri til að róla og renna, hlaupa um og fara í fjölbreytta bolta- og hópleiki. Á veturna rennum við okkur á snjóþotum og búum til snjókarla.

Klukkan hálf þrjú fáum við brauðmeti, mjólk, ávexti og grænmeti.

"Börnin skulu klæða sig sjálf í og úr og reyna á sig í leik. Þau skulu fara út í flestum veðrum. Þau skulu upplifa sjálfbærni sem sjálfsagðan þátt í skólastarfinu." Úr námskrá fyrir 5 ára börn í leikskólum Kópavogs.

Styrktarbarn leikskólans í gegnum SOS barnaþorpin er hún Isabella (f. 12.11. 2016) frá Tansaníu. Börnin velja í sameiningu afmælis- og jólagjafirnar hennar, pakka þeim inn, búa til kort og fara með þær á pósthúsið.

Þegar barn á afmæli stjórnar það afmælisstund þar sem farið er í skemmtilega leiki auk þess sem öll deildin fer út og flaggar fyrir afmælisbarninu og syngur fyrir það afmælissönginn. Börnin útbúa kórónu og velja sér skikkju til að vera í þann daginn.

Á afmælisdegi Ísabellu bjóðum við foreldrum upp á veitingar og baukur liggur frammi henni til styrktar, sá peningur sem safnast hefur fara elstu börnin með á SOS skrifstofuna. Þannig gefst börnunum tækifæri til að láta gott af sér leiða og læra um önnur lönd og aðrar aðstæður en við eigum að venjast hér. 

"Börnin skulu kynnast mismunandi þjóðmenningu og temja sér jákvætt viðhorf til ólíks uppruna og sérkenna annarra." Úr námskrá fyrir 5 ára börn í leikskólum Kópavogs

"Börnin skulu búa við umhverfi sem stuðlar að vellíðan." Úr námskrá fyrir 5 ára börn í leikskólum Kópavogs

Einu sinni í viku fara börnin í íþróttahúsið í Digranesi. Þar læra þau að fara eftir fyrirmælum og fara í fjölbreytta hópleiki og hlaupa og hafa gaman.

Á skólaárinu förum við í margskonar menningarferðir og má þar nefna heimsóknir í Menningarhús Kópavogs, Þjóðleikhúsið, Hörpu og Þjóðminjasafnið.

"Börnin skulu hafa aðgang að mismunandi hreyfisvæðum úti og inni. Þau skulu fara í leiki þar sem þau nota líkamann." Úr námskrá fyrir 5 ára börn í leikskólum Kópavogs

"Börnin skulu fara á sýningar, tónleika og söfn. Þau skulu fara í vettvangsferðir sem bjóða upp á mismunandi upplifun." Úr námskrá fyrir 5 ára börn í leikskólum Kópavogs

Fyrir mat og síðdegishressingu söfnumst við saman og lærum í gegnum söng ýmsar þulur, ljóð  og rím og syngjum lög sem tengjast lífsgildunum okkar og líðandi stund. Einnig förum við í leiki sem tengjast læsi. Börnin fá að tjá sig og kynnast lýðræðislegum vinnubrögðum við val á leikjum og ljóðum.

Tvisvar í viku förum við í vináttustundir þar sem börnin læra um vináttuna og ræðum myndir sem sýna einhvers konar óæskilega hegðun. Börnin reyna að finna lausnir auk þess sem sögur eru lesnar og söngvar sungnir. 

"Börnin skulu eiga viðurkennandi samskipti, sjá sjónarmið annarra, sýna umburðarlyndi og tillitssemi, hjálpa hvert öðru og deila með öðrum." Úr námskrá fyrir 5 ára börn í leikskólum Kópavogs

"Börnin skulu verða sem mest sjálfbjarga við daglegar athafnir. Þau skulu nota málið til að tjá hugmyndir sínar og tilfinningar." Úr námskrá fyrir 5 ára börn í leikskólum Kópavogs

Áður en að slökkviliðið heimsækir okkur að vetri fara börnin reglulega um húsið og hjálpa slökkviliðinu með því að athuga hvort brunavarnirnar séu ekki örugglega í lagi í leikskólanum. Rýmingaræfingar eru svo haldnar nokkrum sinnum yfir skólaárið.

Við erum með skjávarpa og bókvarpa. Það notum við u.þ.b einu sinni í mánuði til að brydda upp á tilbreytingu í bóka lestri. Þá fylgjast öll börnin með lestrinum samtímis. Þann dag fellur hefðbundin slökun niður.

"Börnin skulu bera ábyrgð og meta leikskólastarfið." Úr námskrá fyrir 5 ára börn í leikskólum Kópavogs

Einu sinni í viku förum við í gönguferðir og þá oftast upp á Víghól. Verkefnin þar eru að upplifa og njóta, skoða fuglalíf á staðnum, tína birkifræ og laufblöð og vinna að allskonar verkefnum tengdum stærðfræði og læsi. 

Umhverfisálfurinn Flóki heimsækir allar deildir leikskólans reglulega en með honum fylgja skjóður sem í eru bækur, spil og annar fróðleikur sem tengist umhverfismennt. Við gefum okkur tíma til að ræða heimspeki Grænfánans og umhverfismál almennt og lærum af hverju mikilvægt sé að flokka úrgang.

"Börnin skulu fara í vettvangsferðir sem bjóða upp á mismunandi upplifun. Þau skulu læra að bera virðingu fyrir umhverfinu og skilja að vistspor hafa áhrif til framtíðar." Úr námskrá fyrir 5 ára börn í leikskólum Kópavogs

"Börnin skulu upplifa sjálfbærni sem sjálfsagðan þátt í skólastarfinu. Þau skulu læra að vinna með endurvinnslu og sjálfbærni." Úr námskrá fyrir 5 ára börn í leikskólum Kópavogs

Einu sinni í viku fara börnin í myndlist þar sem þau vinna meðal annars að stóru sjálfsmyndarmálverki sem þeim er svo afhent til eignar við útskrift.

Leikskólinn er í góðu samstarfi við Álfhólsskóla og fara elstu börnin þangað í heimsókn við ýmis tækifæri yfir skólaárið. Auk þess tökum við á móti grunnskólabörnum sem lesa fyrir börnin á degi íslenskrar tungu. 

"Börnin skulu vinna með fjölbreyttan, skapandi efnivið og noti ýmis áhöld. Þau skulu tjá hugmyndir sínar og skapa út frá eigin upplifunum." Úr námskrá fyrir 5 ára börn í leikskólum Kópavogs

"Börnin skulu kynnast starfi grunnskóla." Úr námskrá fyrir 5 ára börn í leikskólum Kópavogs

Starfsfólk Lundar

Birgitta Leikskólakennari, deildarstjóri

Bjarkey BA í Uppeldis- og menntunarfræðum

Júlíana háskólamenntaður starfsmaður

Kristey Eide Valgeirsdóttir Leiðbeinandi

Anna Martínková Leiðbeinandi / Ms í sálfræði

Leikur inni

Á morgnana er boðið upp á fjölbreytt leikefni, svo sem fatnað “fafu” sem hentar vel fyrir hlutverkaleiki, púsl, leir, spil, perlur og ýmsar gerðir kubba sem reyna á byggingarhæfni, stærðfræði og samstarf. Inni hvetjum við börnin til sjálfstæðis.

Á hverjum degi fá tvö börn að hjálpa til í daglegum athöfnum svo sem að ná í matinn og leggja á borð. Einnig fá þau að velja eina máltíð yfir veturinn í samstarfi við Elínu matráð. Þau eru svo fyrst í röðinni þegar hópurinn fer út af lóðinni.

"Börn skulu vinna með fjölbreyttan, skapandi efnivið og nota ýmis áhöld. Þau skulu vinna í hóp að sameiginlegu markmiði." Úr námskrá fyrir 5 ára börn í leikskólum Kópavogs.

"Börnin skulu hjálpa til við að leggja á og bera af borðinu." Úr námskrá fyrir 5 ára börn í leikskólum Kópavogs

Name

Safari may block some audio or video from playing automatically and ‘read to me’ will skip these. You can configure this in Safari’s preferences.