Chronika brigady 2006-2014

Chronice na puć

Předsydstwo 1. serbskeje kulturneje brigady w róžowniku 2024

75 lět skutkowanje 1. serbskeje kulturneje brigady zjimane jako digitalny knižny poskitk –
to bě zaměr šulerkow a šulerjow 9. lětnika pod nawodom rjadowniskeje wučerki Juliany Rječkec. Nastali su wosom jednotliwe knihi, dźělene do časowych wotrězkow. W předpolu bě trěbne časowe dokumenty w formje fotow, tekstow a widejow rjadować a digitalizować. Wulka pomoc bě při tym studio Lucija pod nawodom Michała Cyža. Skónčnje bě tak daloko. Šulerjam steješe chronika z ryzy faktami skutkowanja a wulka syła časowych dokumentow k dispoziciji. Za šulerjow steješe nětko naročny nadawk, z wulkeje ličby datow najwažniše a najzajimawše podawki wupytać, do knihow splesć a je wuhotować. Bě to za 15lětnych jězba do zańdźenosće. Husto so za wosobinami abo skrótšenkami organizacijow
a městnosćow prašachu. Amizěrowachu so nad čorno – běłymi wobrazami zažnych lět, kaž nad fotami z nowšeho časa, na kotrychž toho abo tamneho přećela abo swójbneho spóznachu.
Kóžda jednotliwa kniha ma druhi rukopis, kotryž wuhotowar Štefan Hanuš jako zakład za dalše wobdźěłanje wužiwaše. Narok njebě tón, perfektnu knihu wuhotować, ale šulerjo dóstachu składnosć so we wuhotowanju pospytać. Wšitcy nałožowachu wjele prócy
a pokazachu angažement.
Tójšto šulerjow rjadownje spěwa tohorunja w chórje 1. serbskej kulturneje brigady sobu.
Tak su nastali knihi nětčišich brigadnikow za bywše a přichodne generacije brigadnikow, za jich sympatizantow a scyła lubowarjow serbskeho spěwa. Wjeselimy so, zo wobsteji móžnosć sej dopomnjenki wobhladać a w knihach listować. Njewobsteji prawo na dospołnosć.
Jeli-zo tón abo tamny čitar ze wšěm spokojom njeje a druhe informacije ma, tak wjeselimy so nad kóždym pokiwom!

Wjele wjesela při listowanju!

Šulerjo a šulerki, kotřiž su na tutych knihach dźěłali:

Baumgärtlec, Paula
Bauch, Moritz
Budar, Kito Beno
Cyžec, Madlena Philomena
Čornak, Matej
Ćemjer, Beno
Dubawic, Helena
Handrikec Marta Daria

Hančikec, Luisa Marta
Hoza, Metod
Hicka, Danko
Jurk, Milan
Kliman, Franc
Krahl, Dionys-Aron
Malink, Friedrich
Pilzec, Stella Maria

Rauerec, Anastasija
Richter, Franc
Statnik, Ionel
Statnik, Matej Feliks
Suchec, Lydija
Šnabl, Jan
Wićaz, Cajus
Žur, Filip

Projekt spěchuje so wot Załožby za serbski lud, kotraž dóstanje lětnje přiražki z dawkowych srědkow na zakładźe hospodarskich planow, wobzamknjenych wot Zwjazkoweho sejma, Krajneho sejma Braniborskeje a Sakskeho krajneho sejma.

2006

09.02.-11.02. wotměje so chórowe lěhwo
w Děčinje a zwučuje so oratoriji „Wětrnik a časy”.

08.07. Předstaji kulturna brigada (chór, rejwanska skupina) zhromadnje z dalšimi prapremjeru „Wětrnik a časy” w Šmochćicach. Dirigat a nawod ma Friedemann Böhme, choreografiju stwori C. Wendisch.

Serbske nowiny pisaja:

„Něhdźe 750 hosći zeńdźe so ... na dworje Doma biskopa Bena a dožiwi ... prapremjeru prěnjeho serbskeho rockoweho oratorija ...
Z tym docpě ... twórba ... wopytowarski rekord. ...” (10.07.06)
„... Spěwny wukon chóra ... ma so tohodla wysoko hódnoćić, dokelž dyrbjachu něhdźe sto mjeńšinow zasobu spěwać.” (12.07.06)

2007

29.04. wustupja hercy, dudacy
a rejwanska skupina na beneficnym koncerće we Łazku.

20.06. wobrubi chór koncert
w Chrósćicach z programom za Dreux.

21.06.-27.06. wotměje so koncertna jězba chóra do Francoskeje (koncerty
w Chartres a Dreux).

20.11. wotměje so nazymski koncert
w Pančicach.

Serbske nowiny pisaja dnja 04.12.2007:

„... Wšitke wočakowanja přetrjechichu so ...
z koncertom 1. serbskeje kulturneje brigady. ...Bjezdwěla steji tute gymnazialne ćěleso dale na ... jara wysokim niwowje ...”

2008

17.03.-19.03.
Wotměja so proby chóra a rejwanskeje skupiny za Krawcowu „Łužiskoserbsku bjesadu".

07.06. woswjeći Serbski gymnazij 60lětne wobstaće. Swjedźenski program wuhotujetaj chór 5. lětnika a kulturna brigada. Program wospjetuje so 14.06. w Chrósćicach a 15.06. w Slepom.

Serbske nowiny pisaja dnja 01.08.2008:

„… Kaž stajnje běše gymnazialny chór wuběrnje přihotowany a jeho wuměłski nawoda njebě so dał wottrašić wot znatych ćežow, kotrež wuměłsce jara naročne twórby Bjarnata Krawca interpretam wobradźeja. Constanze Wendisch stwori k někotrym čisłam modernu rejwansku choreografiju…”