Golpina je cili dan hodila po boški i iskala kadi bi ča našla za pojisti. 

Jedan stari je nosija na životu u vriči ribu. Golpina se došegala do njega, prigrizla vriču i uzela ribu. Smijala se staremu da mu sad ni teško nositi, i da je ona prava kako mu je samo pomogla. 

Doša je vuk i reka da je i on lačan. Golpina se spensivala da je ribu ulovila u lokvi. Rekla je vuku da vrže rep u vodu i da će mu se riba naloviti, samo da zajno mora govoriti: “Vedri se vedri, vedri nebo, mrzni se, mrzni repino!” 
 

 Vuk je poša na lokvu i učinija ča mu je golpina rekla. Kad je prova zvaditi rep, ni moga jer mu se zaledija. Pensa je da je ulovija ribu. Vuk je vuka dok si rep ni prekinija. Vika je da je sada bez repa i lačan. Golpina ga je vred utišila i rekla da će mu ben naresti drugi rep, a za jisti će ča najti u boški. 

Loading...

Počelo se mračiti i misec je zaša na nebu. Vuk je joka da je lačan i da mora ča pojisti. Kad je vidila kako se u lokvi blišti misec vred je rekla vuku da je to veliki kus sira u vodi. Rekla mu je da moraju popiti svu vodu i da će dojti do sira. Vuk je vred hlapa tu vodu kako bi ča prije doša do sira, a golpina je samo lickala kako da pije, ma ni niš pila.  
Vuku je naresa trbuh od vode. Kad su sve popili sira ni bilo nideri. Golpina mu je rekla da su bili blago, aš je misec gori na nebu, a da se takov vidija u vodi. 

Loading...

Loading...

Pomalo su pošli naprid po boški iskati za jisti. Došli su do jenega sela u ken je bija pir. Sakrili su se zad kope i čekali da svati pojdu u hižu, pa da moru kresti. Roženice su zasvirale. Svati su zaplesali balun i zakantali. Kad su svati pošli u hižu jisti, golpina je rekla vuku neka gre kresti kokoške, a ona da će stati sprid vrati i čuvati da ki ne zajde.  
Vuk je poša kresti. Golpina je došla bliže hiže i vikala ljudima da im vuk krede kokoške. 

Svati su zašli z hiže, uzeli vile i kolce, ča je ki čapa i počeli teči za vukom i mlatiti po njemu. Svega su ga stukli i sprebijali, ma njin je steši riva ujti.  
Dokle je golpina pošla u hižu i najila se fuži s kokošon, kapuza i mesa. Kad je čula svate da se tornivaju, prosula si je punu padelu riži na glavu kako da su joj moždani zašli. 
 

Potekla je iskati vuka. Vuk je joka da ga kosti bole i da su ga svega stukli. Golpina mu je rekla da tote ne moru ustati, aš bi se ljudi mogli tornati i ubiti ih i da će je morati nositi perke ne more hoditi.  Vuk brižan svi stučen i sprebijan je nosija golpinu na životu i pomalo hodija naprid. Golpina se smijala: “Bolan zdravega nosi! Bolan zdravega nosi!” 

Kad su došli poli jenu jamu, golpina je rekla da će tote spati. Golpina je legla poli jame,a vuk dalje aš ga je bilo strah. Kad je vuk zaspa golpina se je prehitila priko njega, dalje od jame i počela ga rivati. Golpina ga je rivala dok vuk ni pa u jamu. Vuk je zva da mu pomore, a golpina mu se zgor jame smijala. 
 

Tako je vuk usta u jami, a golpina? Golpina i danas po boški gre i išće kadi bi ča ulovila.