Foreldrahandbók Kópasteins

Kæru foreldrar/forráðamenn
Við bjóðum ykkur og barnið/börnin ykkar velkomið í leikskólann Kópastein.
Fyrstu dagarnir í leikskólanum eru mikilvægir fyrir barnið þar sem það aðlagast nýjum aðstæðum. Til þess að barn fái notið leikskóladvalarinnar sem best skiptir góð samvinna við foreldra miklu máli. Við vonum að þessi foreldrahandbók sé góður leiðarvísir fyrir ykkur til þess að afla ykkur upplýsinga og kynnast starfsemi leikskólans betur.

Með von um gott og farsælt samstarf,
starfsfólk leikskólans Kópasteins

Um Kópastein
Leikskólinn Kópasteinn er fimm deilda leikskóli og hér dvelja 94 börn. Leikskólinn starfar eftir lögum um leikskóla, aðalnámskrá leikskóla og skólanámskrá leikskólans. Við leggjum áherslu á vellíðan barna og starf sem kemur þeim til góða og leiðir til aukins vaxtar og þroska. Leikurinn er helsta náms- og þroskaleið barnanna og kjarni uppeldisstarfsins. Í gegnum leik barnanna og vinnustundir er lögð rík áhersla á sjálfbærni, sköpun, tónlist, lífsleikni og góð gildi í samskiptum. Umhverfið er einnig stór þáttur í námsumhverfi barnanna. Einkunnarorð leikskólans eru gaman saman.

Opnunartími, deildir, dvalartími og leikskólagjöld

Leikskólinn er opinn frá kl. 7:30-16:30 alla virka daga. Deildir leikskólans eru fimm: Lyngholt, Hulduholt, Dvergholt, Steinholt og Álfholt. Á Lyngholti og Hulduholti dvelja yngstu börn leikskólans og síðan koll af kolli. Þær deildir eru staðsettar í Litla steini við hlið leikskólans, en haustið 2023 stækkaði skólinn um þessar deildir. Nokkrir dvalartímar eru í boði og stendur hann á heilli eða hálfri klukkustund, en heimilt er að skipta hálfri klukkustund í 2x15 mínútur. Uppsagnarfrestur á leikskólaplássi er einn mánuður og miðast hann við fyrsta eða fimmtánda dag hvers mánaðar. Uppsögn þarf að vera skrifleg til leikskólastjóra. Óski foreldrar eftir breytingu á dvalartíma metur leikskólastjóri hvort og hvenær hægt sé að verða við þeirri beiðni. Leikskólagjöld eru greidd fyrirfram í byrjun hvers mánaðar og er greiðsluseðill sendur út.

Að byrja í leikskóla

Að byrja í leikskóla er mikil breyting og felur í sér nýja reynslu fyrir barn og foreldra þess. Aðlögun nýrra barna fer að jafnaði fram í lok sumars/að hausti og tekur yfirleitt um sjö daga. Aðlögun er einstaklingsbundin en stefnt er að því að búið sé að aðlaga barnið innan 10 daga. Allt ferlið er unnið í samvinnu við foreldra og ef barn þarf meiri tíma til að aðlagast verður komið til móts við þarfir þess. Á fyrsta degi aðlögunar eru foreldrar boðaðir ásamt barni sínu í leikskólann þar sem gengið er frá undirritun dvalarsamnings, deildin skoðuð og heilsað upp á starfsfólk deildarinnar. Foreldrar eru einnig beðnir um að upplýsa deildarstjóra/starfsmann um heilsufar barnsins og þeir hvattir til að spyrjast fyrir ef spurningar vakna um starfið og dagskipulag deildarinnar. Í aðlöguninni er lagður grunnur að samstarfi milli starfsfólks og foreldra.

Aðlögun milli deilda

Aðlögun milli deilda fer fram að hausti. Kennarar skólans sjá um þann flutning og upplýsa foreldra um það ferli. Börnin aðlagast með hópnum sínum og fer kennari með þeim fyrstu daganna. Þetta ferli tekur yfirleitt ekki nema 2-3 daga og fer það eftir aldri barnanna.

Samstarf leik- og grunnskóla - Skólabrú

Heimaskóli Kópasteins er Kársnesskóli en flest börn leikskólans hefja grunnskólagöngu sína þar. Ef börn fara í aðra skóla er það í höndum foreldra að vera í samstarfi við skólana en stundum hefur leikskólinn einnig verið í samstarfi við Kópavogsskóla ef fyrirséð er að mörg börn muni fara þangað. Haldnir eru samráðsfundir þar sem samstarfið og skólaheimsóknirnar eru skipulagðar og endurmetnar. Tengiliðir frá Kópasteini og hinum leikskólunum á Kársnesinu ásamt Kársnesskóla sitja fundina sem eru a.m.k. tvisvar á skólaárinu, þ.e. í upphafi og lok skólaársins.
Fyrirkomulag skólaheimsókna í Kársnesskóla getur verið breytilegt milli ára en foreldrar eru ávallt upplýstir um skipulagið hverju sinni. Skólaheimsóknirnar fela m.a. í sér heimsókn á bókasafn skólans, skoðunarferð um skólann og frístund, þátttaka í kennslustundum ásamt heimsókn á viðburð í sal skólans. Að lokum heimsækja börnin leikskólann eftir að þau hetja nám í grunnskólanum og rifja þannig upp gamla tíma.

Daglegt líf

Dagskipulag deildanna er misjafnt eftir deildum. Hér má sjá grunn að dagskipulagi deildanna, en það getur þó breyst lítillega milli deilda með tilliti til vinnustunda, tónlistartíma, vettvangsferða og fleira.

Dagskipulag á Lyngholti, Hulduholti og Dvergholti
Kl. 07:30 Leikskólinn opnar
Kl. 08:00 Allar deildir opna – frjáls leikur
Kl. 08:15 Morgunmatur til 08:45
Kl. 09:15 Frjáls leikur úti eða inni/skapandi starf
Kl. 10:30 Bleiuskipti/salerni, handþvottur
Kl. 11:00 Samverustund
Kl. 11:15/11:30 Hádegisverður
Kl. 11:45 Hvíld
Kl. 13:15 Frjáls leikur úti eða inni/skapandi starf
Kl. 14:30 Síðdegishressing
Kl. 15:00 Bleiuskipti/salerni, handþvottur
Kl. 15:00 Frjáls leikur
Kl. 16:30 Leikskólinn lokar

Dagskipulag á Steinholti og Álfholti
Kl. 07:30 Leikskólinn opnar
Kl. 08:00 – 9:15 Allar deildir opna/frjáls leikur
Kl. 08:15 Morgunmatur til 8:45
Kl.9:15 Samverustund/Ávaxtastund
Kl. 09:30 Vinnustund/val/tónlist/hreyfing/útivera
Kl. 11:30 Samverustund
Kl. 11:45 Hádegisverður
Kl. 12:15 Hvíld
Kl. 13:00 Leikur úti/inni
Kl. 14:15 Samverustund
Kl. 14:30 Síðdegishressing
Kl. 15:00 Frjáls leikur
Kl. 16:30 Leikskólinn lokar

Frjáls leikur

Leikurinn er megin námsleið barna, hann er gleðigjafi og veitir vellíðan. Leikurinn í allri sinni fjölbreytni er kjarninn í uppeldisstarfi allra leikskóla. Leikskólakennarar þekkja leik barna, þeir virða og hlúa að honum, gefa honum rými og skipuleggja leikumhverfið. Í leik taka börn þátt í lýðræðislegum athöfnum þegar þau setja fram eigin hugmyndir og virða sjónarmið annarra. Leikskólakennarar styðja við leik barna á margvíslegan hátt. Börnum er gefinn nægur tími og rými til að hreyfa sig, þróa leikinn og dýpka. Í Kópasteini er gengið út frá því að börn læri best í leik og þurfa því öll viðfangsefni leikskólans að taka mið af því. (tekið úr námskrá Kópasteins).

Útivera

Í leikskólanum stefnum við að því að börnin fari í útiveru daglega og læri að klæða sig eftir aðstæðum. Í útiveru fá börnin útrás, gott rými til hreyfinga og aðstæður til að nota stóru vöðvana í líkamanum. Þau fá tækifæri fyrir háværari og plássfrekari leiki og tækifæri til að leysa deilur sjálf þar sem nálægðin við fullorðna er minni. Flestar deildir fara í vettvangs- og gönguferðir, eldri deildir oftar en þær yngri. Börnin klæðast endurskinsvestum og gætt er fyllsta öryggis, en gönguferðir eru alltaf háðar starfsmannahaldi hverju sinni.

Tónlist
Í Kópasteini er mikil áhersla lögð á tónlist. Við leikskólann starfa tónlistarkennari og fara öll börn leikskólans í tónlistartíma einu sinni viku auk söngstundar þar sem allur leikskólinn hittist á mánudagsmorgni og syngur saman. Á vorönn taka elstu börnin þátt í samsöng undir handleiðslu tónlistarkennara. Samsöngurinn er einu sinni í viku og er markmiðið að börnin læri og æfi ný lög sem þau síðan syngja á útskrift barnanna um vorið, Kópagleði.

Blær
Leikskólinn er þátttakandi í vináttuverkefni Barnaheilla en táknmynd vináttu í verkefninu er bangsinn Blær. Öll börnin leikskólans fá sinn eigin Blæ bangsa sem þau geyma í leikskólanum og fylgir hann hverju og einu barni alla leikskólagönguna. Blær sameinar börnin og minnir þau á að gæta hvers annars vel og vera góður félagi. Hugmyndafræði verkefnisins endurspeglast í fjórum gildum: umburðarlyndi, virðing, umhyggja og hugrekki. Í Blæstundum er unnið með gildin til hliðsjónar t.d. í gegnum söng, sögur og umræður sem börnin eru virkir þátttakendur í.

Lubbi finnur málbein
Á öllum deildum leikskólans er unnið með Lubba finnur málbein en það er málörvunarefni fyrir börn á leikskólaaldri sem ýtir undir hljóðanám þeirra. Efnið ýtir undir stafa- og hljóðþekkingu barna ásamt hljóðkerfisvitund sem eru jafnframt undirstöðuþættir fyrir lestur. Lubbastundir fara fram á öllum deildum einu sinni viku en áherslur stundarinnar fara eftir aldri barnanna.

Skapandi starf
Á öllum deildum fara börn í vinnustundir þar sem boðið er upp á skapandi starf þar sem m.a. er notast við ýmis konar endurvinnanlegan efnivið og efnivið náttúrunnar. Þar fær hugmyndaflugið að njóta sín og börnin hvött til sjálfstæðra vinnubragða. Eldri deildir hafa afnot af listaskálanum okkar í kjallara hússins fyrir vinnustundir en yngri deildir hafa afnot af Regnbogaherbergi sem er staðsett í vesturenda.

Könnunarleikurinn
Á yngstu deild er hefð fyrir að bjóða börnum upp á könnunarleik svokallaðan, þar sem börnin fá ýmsa hversdagslega hluti og verðlausan efnivið til þess að leika með. Í könnunarleik fá börnin tækifæri til að uppgötva og kanna umhverfi sitt. Markmiðið er að börnin uppgötvi hlutina og möguleika þeirra með snertingu, heyrn, sjón, lykt og bragði, ásamt því að örva gróf- og fínhreyfingar. Könnunarleikurinn kemur ekki í staðinn fyrir frjálsan leik heldur er hann ætlaður sem viðbóta, til að auðga leik yngstu barnanna.

Að koma og fara
Leikskólinn leggur mikið upp úr því að tekið sé vel á móti hverju og einu barni á morgnanna. Það skiptir miklu máli að foreldrar fullvissi sig um að starfsmaður hafi tekið á móti barninu áður en þeir yfirgefa leikskólann og láti starfsmenn viðkomandi deildar vita þegar barnið er sótt. Foreldrar gefa leikskólanum upplýsingar um hverjir mega sækja barnið í leikskólann. Mikilvægt er að foreldrar tilkynni starfsfólki ef barn er sótt af öðrum.

Matur og næring
Mikilvægt er að hjálpa börnunum að temja sér heilbrigðar matarvenjur til framtíðar. Þannig leggjum við grunninn að fæðuvenjum þeirra síðar meir sem og viðhorfum þeirra til matar. Börn fái tækifæri til að borða fjölbreyttan og hollan mat bæði til þess að matarsmekkur þeirra verði fjölbreyttur og þau dafni og þroskist eðlilega.
Boðið er upp á grænmeti og/eða ávexti daglega í tengslum við allar máltíðir leikskólanna m.a. með og í mat, sem álegg og millibita. Eftir því sem þroski og færni barnanna eykst skammta þau sér sjálf á diskana og þau eru hvött til að smakka allan mat.

Svefn og hvíld
Eftir hádegismat fara allar deildir í hvíld. Fyrirkomulag hvíldar fer eftir aldri og þroska barnanna, yngi börnin sofa, en þau eldri hvíla sig og hlusta á sögur eða tónlist. Svefn er skráður í Völu svo foreldrar geta fylgst með. Á vef Heilsuveru má finna upplýsingar um svefnþörf einstaklinga á öllum aldri. Þar segir um börn 1-2 ára að þau þurfi 11-14 klst á sólarhring og börn 3-5 ára þurfi 10-13 klst á sólarhring. Á vef Landlæknis má finna gagnlegar upplýsingar um heilsu og líðan leikskólabarna ásamt upplýsingum um mikilvægi svefns

Fatnaður

Útifatnaður: Mikilvægt er að börnin séu ávallt vel búin til útiveru í leikskólanum og þarf hann að henta árstíð og veðurfari hverju sinni. Öll börn fara út einu sinni í dag, nema þegar veður hamlar í einstaka tilfellum. Útifatnað má geyma í leikskólanum virka daga en hann er tekinn heim á föstudögum. Vinsamlegast geymið ekki poka/töskur fyrir útiföt í hólfum barnanna, þeir eru plássfrekir og geta verið hamlandi fyrir börn og starfsfólk.
Aukafatakassi: Fyrir ofan hólf barnanna er aukafatakassi. Í honum á að vera að minnsta kosti tvö sett af bolum, buxum, nærfötum og sokkum. Við óskum eftir að þar sé einnig fjölnotapoki sem hægt er að nota fyrir blaut föt.

Merkingar á fatnaði: Allur útifatnaður þarf að vera merktur barninu. Ef flíkur týnast er líklegra að þær skili sér aftur á réttan stað séu þær merktar. Yngri börn vita oft heldur ekki hvaða fatnað þau eiga svo það auðveldar bæði þeim og starfsfólki að fötin séu vel merkt.

Bleiur og blautþurrkur, snuð/bangsar í hvíld: Foreldrar koma með bleiur og blautþurrkur í leikskólann fyrir börn sín. Börn yngri deilda mega einnig koma með snuð og/eða bangsa að heiman til að hafa í hvíld og er það þá geymt í leikskólanum en er reglulega sent heim til þrifa.

Hefðir

Afmæli: Afmælisbarn föndrar kórónu og afmælissöngur sunginn inni á deild. Í söngstund á mánudögum í sal skólans er síðan sunginn afmælissöngur fyrir afmælisbörn liðinnar viku. Afmælissöng leikskólans má hlusta á hér.
Desember: Við leggjum upp með rólegt andrúmsloft í leikskólanum í kringum jólin. Þó eru nokkrir viðburðir sem hafa fest sig í sessi hjá okkur. Gestur í garðinn, þá er foreldrum boðið í kakó út í garð og við fáum heimsókn frá jólasveinum. Starfsmenn leika gömlu jólasveinana í salnum fyrir börnin þar sem lestin er Jólasveinaþula Jóhannesar úr Kötlum. Jólaball fyrir börn og starfsfólk í salnum og jólamatur í hádeginu.
Þorrinn og Góa: Við höldum upp á Þorrann og á Bóndadegi er boðið upp á þorramat fyrir börn og starfsfólk. Á Góunni er foreldrum boðið í Góukaffi þar sem boðið er upp á vöfflur inni á deildum.
Bolludagur, Sprengidagur og Öskudagur: Á Bolludegi er boðið upp á fiskibollur í hádegismat og rjómabollur í síðdegishressingu. Á Sprengidag er saltkjöt og baunir á boðstólnum. Á Öskudag mega börnin mæta í búning í leikskólann. Allir deildi halda öskudagsball sem endar með einhverju góðgæti, t.d. safa og snakki.
Vorhátið – Komdu að leika: Vorhátið leikskólans er haldin í maí ár hvert. Þá er foreldrum boðið í leikskólann að skoða listasýningu með skapandi starfi barnanna. Einnig bjóða deildir upp á ýmis leiktilboð þar sem foreldrar og börn leika saman.
Sumarskóli: Sumarskólinn okkar byrjar í júní en þá er ýmislegt skemmtilegt á dagsskrá í útveru að morgni. Hver deild sér um að bjóða upp á leikefni í útiveru og settar eru upp stöðvar sem börnin geta leikið sér í, t.d. körfuboltar, dúkkur, kubbar, sullstöð, krítar, sápukúlur og fleira.